Assalamu'alaikum Wr. Wb
Alhamdulillah, dengan mengucap syukur kehadirat Allah SWT, pada penghujung tahun sambilan baleh lapan puluah tujuah ko, tahun ka salapan badirinyo Balerong Group Jakarta. Kami dapek kasampatan manampilkan sabuah paket spesial, yaitu ceramah adat Minangkabau nan kami bari judul "Kepribadian Minang ".
Kalau salauik salaman nangko kami datang manamui para penggemar jo curito-curito drama nan batemakan adat dan agamo, mako kini kami mancogok jo bantuak ceramah. Insya Allah dengan fersi baruko kironyo pesan-pesan balerong akan labiah luas dan mantap mencapai sasarannyo. Dan seandainyo masyarakat menghendaki, maka sarial bariukuiknyo akan manyusul sacaro berkala. Akan kami cubo maangkek parmasalahan sampai dimano peranan adat dalam pembentukan pribadi manusia Minang, bia sacaro perorangan ataupun sacara kelompok. Tantu sajo sampai bateh-bateh nan mungkin dan patuik kito jangkau.
Dunsanak pandanga nan kami hormati.
Takalo Ambo tagak di corong studio rekaman wakatu mambuek kasetko, Ambo mambayangkan sadang maado'i majelis anak-anak mudo Minang. Satu forum dimano sedang berlangsung dialog antaro mamak jo kamanakan, sadang berkomunikasi antaro adiak jo kako atau sadang berbincang-bincang anak jo bapaknyo. Dan sabananyolah sajak samulo lah tapasang niat dalam batin kalau materi kaset nangko ambo alamatkan kapado generasi penerus Minangkabau, di rantau ataupun di kampuang. Tapi alangkah berbahagianyo kami, sakironyo pangajaran ringan nangko adoh juo manfaatnyo kapado generasi nan labiah tuo, minimal sebagai bahan perbandingan. Mudah-mudahan sajo.
Angku-angku dunsanak pandanga.
Sacaro jujur kami akui, bahwa kalau dipandang dari segi penguasaan ilmu adat, rasonyo sio-siolah kami manatiangkan ceramah sarupo iko. "Alun baban patuik di galeh", kami katokan baitu sabab berbicara mengenai adat adolah berbicara tentang kemanusiaan. Baitu luasnya ruang lingkup permasalahan nan manjadi wawasan adat Minang itu sendiri. Tidak sajo cultural, yo skopnyo mancapai bidang sosial, bidang ekonomi, politik, agamo, hukum dan lain sebagainyo. Terlalu kompleks memang, apolai bagi kami nan tidak sempat mengenyam pendidikan di perguruan tinggi.
Namun samantang pun baitu didesak oleh hak dan kewajiban sebagai warga Minang nan cinto Minang, ditambah dengan beban moral sebagai pemangku adat, mako kami maraso terpanggil untuk berbuat, sampaikan walau seayat. Itulah modal kami.
Angku-angku.
Sajak baredarnyo curito kaset di simpang duo, secaro langsung kami mengamati animo generasi mudo terhadok adat Minang. Kasimpulan kami iyolah, disatu pihak sangat memprihatinkan. Bahwa adat lah kahilangan pamor dalam pergaulan modern. Urang kini cenderung memasuki kehidupan praktis. Sifatnyo indifidual dan polanyo materialis. Adat indak lai relevan untuak diperbincangkan, apolai untuak dianut, ditaati. Falsafah hidup alam Minang tinggal kenangan, inyolah punah dilando badai seleksi nilai. Akan tetapi, dari pihak lain kami manampak bahwa adoh samacam kerinduan bagi sekelompok pemuda untuk mengetahui adat. Apo dan baa bana itu adat? Unsur apo nan mampatamukan pandang antaro moral Islam dan moral adat? Aponyo nan unik dan kanapo mangko popular sampai dituliti urang lua?, nyo mancari, mancari dan mancari. Dikakeh-kakehnyo abu angek nan indak barasok lai untuak manamukan api nan pernah manyalo dahulunyo. Dibaconyo buku tambo, alun abiah salaman dilatakkannyo sabab isinyo batele-tele, dibaliak-baliaknyo curito kaba, ternyato bacaan anak SD, diteliti buku nan lain, kaku dan dokmatis atau talampau formal, kurang mandasar. Kemudian diajaknyo datuak-datuak berkonsultasi, ditanyo kian kamari, dibandiang, dianalisa, akhirnyo buntu. Sabab mamak mati katakutan tuahnyo ka taimpik.
Diadokkannyo diskusi samo gadang, percuma. Kusia buto, kudo pun buto, urang manumpang buto pulo dan nan paling mangecewakan mereka iyolah sirnanyo praktek adat dalam masyarakat adat itu sendiri, "jajak limpua baun lah hilang, lanyok buruan dalam rimbo, apo katenggang nak nyo lupak", saying sekali. Namun sesuatu nan menggembirakan adolah dengan nampaknyo kesungguhan mareka untuak tahu, dan terlepas dari motivasi keingintahuan mereka itu sewajarnyolah kito mauluakan tangan, manyambuik iktikad baiak anak kamanakan kito. Untuak itulah, sakadar mambantu mambarikan arah dan mensibakkan samak jo baluka, marambah jalan satapak, mudah-mudahan basuo juo jalan rayo titian batu manuju ranah nan kito cito, yaitu pewarisan adat dari mamak ka kamanakan.
Limbak nan dari pado itu, saibarat urang manabua banian kok adoh nan boneh siso balam, nyo tumbuah di tapi pasamaian lambuak lah nak nyo bapucuak. Nyampang lai maurak daun pindahkan ka tangah sawah, tolong diaro, disiangi. Kok lai untuang ka mujua ko mak, nyo rimbun daun nan mudo maurai babuah labek batangkai baduyun-duyun, pulangkan juo ka rangkiang. Tapi pulo sakironyo ampo padi katampang, malang malah tibo dikito. Malu kami nak kami gungguang surang pado marintang partahunan, himpokkan sajo di pamatang, hanyuikkan di lantam aia, ka bungo luluak jadi juo.
Kemudian kapado angku-angku, niniak maak, ahli adat, langkok sarato cadiak pandai, urang nan arih cando kio. Ambo mamohon, baringan mamak manyapo jo managua, tolong maanjak ka batu, ka taereang basamo mandatakan. Sabab baalah dek baitu, ambo kok sasek gawa nan banyak, dek salah mulai di mangayam nyo bungkuak lapiak di tangah, rusak adat binaso undang, cabuah lah buek rang dahulu, samo barutang kito isuak. Nak bak sakarang kini nangko, tambilang di rumpun lansek, tasanda samo jo sariak, rantai bi duduak ateh paran. Ambo bilang sado nan dapek, nan tingga untuak nan cadiak, bangkalai datuak manyudahkan. Nak duo pantun sapiriang kayu kalek, kayu surian di samak tumbuah kaduonyo, paharek duduak kamanakan mamak mamulai bicaro.
Sebagai setumpuak dari rumpun ras melayu Minangkabau lah lao dikenal di kawasan Asia Tenggara, bahkan hampia di seluruh dunia peradatan di Timur ataupun di Barat. Jauah sabalun bangso-bangso Eropah manjalajah ka Asia Timur atau kabulakang lai sabalun urang-urang India, Parsi jo Tiongkok tibo di Kepulauan Nusantara, Minangkabau ko lah tasabuik-sabuik juo. Akan tetapi sampai kini alun ado berita sejarah nan terperinci mengenai kerajaan Minangkabau kuno. Banyak pertanyaan nan alun terjawab. Pabilo masonyo Minangkabau muncul di Sumatera? Sia pendirinyo? Siapo rajo-rajonyo? Sampai dimana wilayah taklukannyo? Baa bantuak pemerintahannyo? Dan lain-lain sebagainya. Ndak surang pun ahli sejarah nan bukak suaro, apo buliah buat.
Kalaulah kito batanyo kapado tuan-tuan para ahli, apo sabab katarangan tantang nagari kami kalam tuan? Seakan-akan kami ko ndak pernah ado dahulunyo? Mako spontan mereka akan menjawab, "karena nagari angku indak maninggakan bukti-bukti ilmiah sabagai bahan penyelidikan sejarah". Memang, memang Minangkabau sangat minim jo prasasti dan nan paliang parah kito ndak punyo tulisan seperti halnyo Suku Jawa, Suku Batak, lampung dan Bugis, nan mancatat parjalanan sajarah nagarinyo. Untuang sajolah ado sabuah candi batulisan Jawa Kuno di Sungai Lansek nan manarangkan kedatangan Aditiawarman ka tanah Minang. Kini candi itu dilatakkan di Museum Nasional Jakarta. Nah, itulah hanyo nan bajaso maninggakan bukti bahwa Minangkabau pernah jaya pado awal abad ke-14 M. tapi sasudah itu, hilang lanyok pulo curitonyo sampai kemudian urang Eropah masuak ka Sumatera Barat.
Dunsanak pandanga, Ambo ingin mangatokan bahwa sabananyo Minangkabau punyo sumber sejarah nan bisa dipertanggung jawabkan. Sumber nan tak kalah nilainyo dari satumpuak candi-candi, prasasti, atau tulisan-tulisan purbakala, Apo itu? Iyolah Tambo dan Kaba. Tapi sabalun kalimat Ambo agiah, para ahli sejarah akan membantah bahwa pandapek itu adolah ndak masuak aka, pandapek ngawur, asbun, bakatai-katai caro awaknyo. Sabab baa mako itu, tando atau kaba tak lain dari kumpulan curito-curito legenda, atau setidak-tidaknyo manuruik salah satu buku nan pernah ambo baco, bahwa tambo barisi 98% dongeng nan 2 % sejarah.
Hanyo 2%, ndak labiah. Mako kasimpulannyo, para sejarawan dan budayawan sapandapek manatapkan pada dasarnyo tambo hanyalah sebagai hikayat dari zaman antah barantah, antah iyo antah indak, tapi banyak bohongnyo. Bukti, dicuritokan dalam tambo Niniak Mamak urang Minangkabau adolah DT. Maharajo Dirajo, baliau ko adiak bungsu dari ba tigo badunsanak. Kakaknyo nan tangah bagala Maharajo Dipang, nan turun ka Benua Cino. Nan tuo bagala Maharajo Alif, asal muasalnyo banso Rum. Ayah mereka adolah Rajo Iskandar Zulkarnain bin Ziis as., nan dikawinkan jo bidadari di dalam sarugo tujuah pangkek. Sadangkan Ziiz as. ko adolah salah saorang anak Adam nan kurang maso ampek puluah, bitu kisah dalam tambo.
Nah, jadi timbul pertanyaan, pabilo urang Minang kenal jo Nabi Adam? Dimaa nyo tau kalau disarugo adoh bidadari? Dari maa datangnyo kata Alif sabagai huruf awal dari abjad Arab?. Sudah pasti informasi samacam iko mereka tarimo dari pelajaran agamo Islam. Artinyo tambo itu disusun urang sasudah Islam masuak ka Minangkabau, baru kiro-kiro 400 tahun nan lalu. Sabalun itu? Antah.
A, mereka lanjutkan. Nampaknyo tambo ingin mangatokan bahwa urang Minangkabau adolah bangsa super, bangsa terpandang di dunia. Sebab di zaman dulu dunia pernah diperintah oleh duo kekuatan Adikuasa, yaitu Roma di Barat dan Tiongkok di Timut. Dan kekuatan katigo adolah Minangkabau, di Pulau Paco. Duduak samo randah, tagak samo tinggi, satingkek, sadarajat jo negara-negara raksasa di dunia. hebat, hebat bukan?
Nah, bukti lain. Manuruik satu fersi silsilah tambo nan pernah kami baco, adopun DT. Maharajo Dirajo baranak sapasang bak anak balam. Nan laki-laki banamo DT. Suri Dirajo, nan padusi banamo Puti Indah Julito. Indah Julito kawin jo Rajo Mauliwarman Dewa, dapeklah anak bagala DT. Katumangguangan. Kemudian putri rajo ko dikawinkan pulo jo Cati Bilang pandai, laialah anak baranam, nan tuo bagala DT. Parpatiah Nan Sabatang. Jadi DT. Katumangguangan jo DT. Parpatiah Nan Sabatang adolah cucu langsuang dari Maha Rajo dirajo, sadangkan baliau ko putra Iskandar Zulkarnain Cucu Ziis as. Nah, karano Ziis as. putra Adam nan katigo puluah sambilan, mako kaduo rajo Minangkabau ko nan dikatokan rajo baduo badunsanak saibu balain ayah, adolah generasi kalimo sasudah Nabi Adam, manusia pertama di dunia. Sadangkan sajarah mencatat bahwa DT. Katumangguangan dan DT. Parpatiah Nan Sabatang sadang mamarentah wakatu Aditiawarman mamimpin Kerajaan Minangkabau, tajadinyo pado tahun 1334 M. Lihek Sejarah Nasional, karangan Mr. Muhammad yamin.
Oleh sebab itu nyatolah bahwa urang nan manyusun tambo adolah manusia-manusia bodoh nan tak tahu mamparetongkan wakatu. Urang nan mampicayoi tambo labiah pandia lai karano diota dek urang bodoh nan sio-sio. Tapi tunggu dulu, maambek kamanakan manahan malu, itu baru analisa. Untuak mayakini suatu pandapek kito musti mambandiang, mauji sampai di mano kebenarannyo. "Kok putiah tahan sasah, kok hitam tahan tapo". Kito ado hak mambuek analisa-analisa, buliah ndak sapandapek asakan argumentasinyo ditunjang oleh data nan bisa dipertanggungjawabkan sacaro ilmiah.
Memang, memang kalau diliek kapado tokoh-tokoh nan disabuik dalam tambo, dihubuangkan pulo jo kurun wakatu kajadian. Nampak sakali ketidak wajaran, bahkan kacau balau. Baa kalai disingguangi pulo parahu nan tadampa di puncak Gunuang Marapi. Gunuang nan tingginyo hampia 4.000 meter diateh permukaan lauik, bohong besar itu, tak mungkin. Batua, mereka tu batua. Ambo katokan batua, karano urang mambaco nan tasurek dalam tambo tapi ndak arih jo nan tasirek. ha..., nan kene rusak e kamanakan. Walaupun kito alun dapek manunjuakkan kapastiannyo, namun mambohongkan saluruh isi tambo atau 98% curito khayal, alun dapek kito tarimo. Sabab siapopun tau, bahwa tambo adolah hasil karya sastra tertuo di Minangkabau. Ini marupokan kisah nan diwarihkan dari generasi ka generasi melalui penuturan lisan sesuai dengan perkembangan. Mako gaya bahasa dan penyampaian dan versi curitonyo mengalami perubahan-perubahan tapi bobotnyo tatap sasudah urang Minang mengenal tulisan Arab Melayu, barulah dibukukan. Mako seharusnyolah kalau nak mandanga atau mambaco tambo mesti tau jo bahaso tambo, mampalajari Qur'an musti tau bahaso Arab, paham jo nan usarak, menguasai ilmu bayan maantik dan ma'ani. Baitu juo mampalajari tambo, harus paham jo bahaso Minang Kuno, bisa mauraikan rumus-rumus dan kode-kode terselubung nan penuh teka-teki. Tanpa itu omong kosong sama sekali. Perbendaharaan kato nan dipakai dalam tambo adolah kato-kato klasik, sifatnyo semu, kabua atau dikatokan juo kato klise, kato bayang, kato banisak, kalimatnyo kalimat bersayat dengan seribu makna.
Mako tanpa menterjemahkan dan kemudian mentafsirkan manuruik pengertian nan diisyaratkannyo, mako tambo hanyolah marupokan buah khayal dari manusia-manusia bodoh. A, kini sia nan bodoh, a... urang nan mangaluakan kode porkas ko nan tele atau urang nan manangkok nan pandia, sia?. Tapeklah peribahasa urang Minang, usah diarok kanampak putiak dalam bungo, kalau bukan mato batin nan bamain. Untuak itu dibutuahkan kearifan dalam mempelajari tambo. Kakehkan nan talamun, kambangkan nan talipek, baco nan tasirek, sabab isinyo kalau dibalun sabalun buku, kalau dikambang saleba alam.
Patuik kito petanyakan kini, apokoh yang dimungkasuik dengan keturunan Iskandar Zulkarnain adolah anaknyo secaro biologis? Apo ndak mungkin bidodari hanyo sebagai visualisasi dari putri tercantik umpamonyo? Atau sarugo sebagai lambang kehidupan glamor penuh kemewahan? Indak kok bisa dijangkau pengertian gunuang sagadang talua ayam, maisyaratkan urang nan datang dari jauah? Lai ka mungkin kato-kato mangirok ka ateh langik manyatukan bundo kanduang tabang ka udaro? Baa kalau diartikan pakuasi, mengungsi atau pindah barangkali? Atau gala bungkuak kapado rajo tiang bungkuak sabagai lambang urang nan tak jujur? Mako saderet pertanyaan nan alun tajawab tantang bagaimana, siapa, kapan, dimana dan lain sebagainyo, anda-anda lah nan akan mampalajarinyo dan menjawabnyo.
Usah dinantikan urang lain ka mambukakkan kunci ka untuak awak, mereka hanya memandang nan nampak, mambaco nan tasurek, artinyo basuo kato indak jo kato antah. Nah, carilah kato nan iyo atau kato nan indak. Katokan kato nan boneh, bangkikkan batang tarandam jan sampai lapuak dek balunau. Kami tinggakan karangko di kamanakan, sudahkan bangkalai mamak, kayamlah pandan nan baturiah. Itulah tugas generasi anda, silahkan dan selamat bekerja. A, baiklah untuak samantaro kito karek masalah tambo sampai di siko. Kito aliah ka soal lain, sungguah baraliah sinan juo.
Dunsanak pandanga, kamanakan nan Ambo hormati. Kebudayaan adalah produk dari prilaku dan sikap mental masyarakat suatu daerah. Dan seni sastra nan tertuang dalam tambo, dalam kaba atau dilukis di bait pantun, papatah, bidal, syair dan ungkapan merupakan cermin dari perwatakan urang Minangkabau. Sesuai dengan kepribadiannyo, urang Minang jarang manyatokan sesuatu sacaro gambalng, secaro terbuka atau tude point istilah kerennyo. A... kalau baitu urang awak ko ndak praktis mah datuak. Mungkin, tapi nan pasti urang-urang Minang adolah urang idealis, urang kayo dengan imajinasi nan mautamokan raso. Sahinggo malu tenggang-manenggang dijadikan standar moral. Inyo maukua sesuatu nan nampak dengan nan tidak nampak, disikolah urek budi tatanamnyo. Aratinyo pribadi urang Minang tertutup. Batua, makin jauah talampoknyo sesuatu, makin tinggi nilainyo dan naluri manusia ingin mancari nan tasuruak tu. Tu ka indak.
Nah, kito taruihkan kini.
Tadi ambo sampaikan, bahwa dalam bamain kato bertata laku pola berfikir dan apo sajo aktifitas kegiatannyo, urang awak cenderung manampuah jalan baliku. Mari kito caliak, dalam batutua umpamonyo. Urang Minang selalu mencontoh kapado alam, mangatokan hitam disabuiknyo baro, putiah dimisakannyo tapuang, ampadu aratinyo paik, tanggui duduak nan manih.
Kalau inyo akan mengungkapkan perasaannyo disalurkannyolah lewat pantun. Bait-bait pendek mampu bacurito banyak tentang apo sajo, tapi hanyo urang nan arih bisa paham. Sabab isinyo tersimpan jauah dalam misa jo umpamo. A... cubo dangakan sabuah pantun "Pisau sirawik panjang hulu paukia surau di barangan, diam di lauiklah dahulu samaso pulau balarangan", akan hilanglah pesan si tukang pantun kalau asosiasi nan mandanga tapaku kapado kato-kato dalam arti nan sabananyo. Fungsi lauik jo pulau di siko hanyolah sekedar memberi kesan untuak menggiring lawan mangecek ke pokok persoalan. Pengertiannyo bisa ganda, a... kama ka dibaok? Ka soal asmara, buliah "hanyuiklah buyuang jo angan-angan sabab si dia alah bapunyo", a... itu aratinyo tu. Ha... ka masalah ekonomi, bisa juo "manggagaulah dulu di kaki limo salamo toko alun tagagai". O... ka dibaok ka soal pandidikan cocok, "nyampang ndak luluih sipenmaru menganggurlah agak satahun, kamasuak ka swasta bajuta pitih dimintaknyo", a... kamaa lai? Ka politik, a... itu nan jaleh bana "tangguangkanlah dek Markos tingga di pangasiangan salamo si Qori bakuaso di Filipina", a... putalah kini kama kadibaok lai. Jadi pantun cako punyo sasaran nan banyak dan luas, tapi isinyo bisa disimpulkan dalam satu kato, yaitu prihatin. Itulah nan dimukasuik jo dikambang sahalai bak alam dibalun sabalun buku. A... cubo bandiangkan koni jo pantun Malayu, a... bunyi pantunnyo "dari mana datangnya lintah dari sawah turun ke kali, dari mana datangnya cinta dari mata turun ke hati". Tembak tupai, jaleh mukasuiknyo. Inyo mangecek hanyo soal cinta, ndak bisa dibaok ka nan lain
perbedaan dasar antaro silek awak jo seni beladiri urang lain baitupun falsafah bamain alang-alang, agaknyo paninggalan-paninggalan budaya nan berbentuk non beda itu lah bacarito panjang tantang kapribadian minang tempo dulu sahinggo baunnyo semerbak sampai melintasi daerah perbatasan. Labiah jauh kito manampak seolah-olah lukisan tadi sangajo diabadikan sabagai contoh jo toladan kapado anak cucuknyo kapado kita dan katurunan sunduik basunduik untuak manjadikan nyo landasan sikap dalam hidup bamasyarakat, namun kito manyadari bahwa nantik disuatu maso urang indak lain kamanyukoi gaya bahasa klasik nan kurang komunikator, mungkin isuak rumah gadang hanyo akan ditamui di taman mini Indonesia indah atau dikabun bungo Bukittinggi, jurus-jurus silek minang nan unik tingga sabagai gambar-gambar mati dalam carito komik dan kalau ado urang yang baminat manyusun karya tulis tantang Minangkabau silangkah datang ke perpustakaan laiden di Eropah catatannyo tasimpan dideretan buku-buku tantang mesir kuno tantang kota Menphiz dan Tebe nan tenggelam juo tantang binatang-binatang purba nan lah punah dari permukaan bumi hilanglah nan ma nan kahilang biakan hanyuik nan tarapuang tapi roh adat mesti dipatahankan. Apabilo padam kapribadian minang badatanglah lonceng kamatian minangkabau tinggalah Sumatera Barat sebagai sarang nan pernah bapauni daulunyo dengan kato lain anak-anak kito isuak ndak berhak lain mendakwahkan diri sebagai urang minang tapi saya anak Indonesia kelahiran Sumatera bagian barat kenapa baitu sabab hakikat minang itu bukanlah hasil seni bukanlah wilayah dan bukan juo katurunan, inyo adalah yo tergantunglah pado generasi kito kini. Apokah tungkek estafet itu akan ditaruihkan atau akan dilipek sampai disiko. Apo kito basadio manjadi angkatan pengkhianat nan menggelapkan amanah. Apo kito lasiap manarimo caci maki sumpah sarapah dibelakang hari. Apo kito relakan adat dikubua samantaro kito melestarikan kehidupan gajah, harimau sampai biawak sekalipun jawapannyo ado dalam dado kito surang-surang. Angku-angku dunsanak pandanga pado kesempatan ceramah kini nangko izinkanlah kami malanjuikkan mambaco bahaso-bahaso sandi dalam ujud kreatifitas urang minang kito piliah nan taserak kito rangkai kemudian dikonfigasikan manjadi suatu bentuk nan bisa dicaliak sacaro konkrit. Adopun objek yang kami piliahkan iyolah fungsi surau sebagai sarana pendidikan formal dan informal dan latar belakang tradisi marantau bagi urang minang, nan baiaklah den utang baangsua mako lansai kato basabuik mako dapek akan kito masuak sajo kapado pokok perbincangan didulang sadalung lai pandulang ameh bangka ulu diulang saulang lai panyambuang kaset na daulu. Bismillahirrahmanirrahim. Sesuai dengan kodratnya laki-laki dilayiakan dengan bangun tubuah nan kuat kokoh dengan nyali keberanian nan tinggi dan bapikia labiah rasional dibandiangkan dengan kaum wanita. Barangkali dengan sagalo kalabiahannyo itulah timbua naluri ingin mampimpin, mambarikan parlindungan kapado wanita nan memang mambutuhkan.
Kemudian menyusul hak dan kewajiban antaro kadua balah pihak, sarato pambagian tugas nan tapisah manuruik kadudukan masing-masing. Sajak manusia tingga diguo-guo sampai kapado mangenal peradaban bahkan taruih ka zaman teknologi kini nangko ruponyo pambagian wewenang itu masih tampak nyato walau bateh dan versinyo mangalami perubahan-perubahan. Sekalipun akhirnyo pihak wanita menginginkan persamaan hak nan sabagian lah dicapainyo tapi mustahil malawan kodrat sebab kodrat itu hadir tanpa dimintak dan tanpa dituntuik. Itu sababnyo perjuangan emansipasi kadang-kadang taraso tidak adil karano wanita ndak pernah manuntuik persamaan kawajiban akan pincanglah jalannyo masyarakat sakironyo hak disamakan sadangkan kawajiban ndak saimbang dalam kontek iko minangkabau menganut kaidah tersendiri yaitu mambarikan seluruh apo nan manjadi hak-hak wanita sasuai dengan kodratnyo pulo hak perlindungan keamanan, hak pelayanan ekonomi, kedudukan sosial dan lain sabagainyo nan kasadonyo lah lamo dimiliki wanita minang. Oleh sebab itu tokoh-tokoh wanita nan mengobarkan peran emansipasi ndak pernah muncul ditanah minang karano memang tidak dibutuhkan, untuak apo manuntuik sasuatu nan lah ado dalam genggamannyo. Adat nan marupokan peraturan tatinggi dalam masyarakat terlalu banyak mambarikan fasilitas dan subsidi kepada wanita, rumah gadang secara gratis disuruah tunggu ndak kamanyeo ndak kamangontrak, seluruh hasil harato pusako makanlah minumlah pakailah nak basuami dilamarkan sampai pun katurunan manuruik garis keibuan kurang apolai wanita ditanah baradab ko. Hanyo satu nan tak pernah lapeh dari tangan yaitu kekuasaan walaupun kadang-kadang urang laki-laki sampai mangalah ka rantau urang demi kesejahteraan dunsanak kamanakan namun kato putuih ado ditangan mamak wanita minang tidka mengatur tetapi diatur mereka hanyo punyo hak pakai bukan memiliki, biapun kunci ado dipinggang tapi rangkiang indak ka dibukak oleh parintah siapopun kecuali suruahan mamak sabaliaknyo mentang-mentang punyo kuaso seorang mamak ndak buliah saleluaso maambiak padi sabalun ado persesuaian dari bundo urang padusi ndak berhak jadi penghulu, namun penghulu alun ka tagak kalau para bundo kanduang sapakaiak indak manarimo baitu sapanjang adait dipusako takalau cindua mato dihadapkan sebagai terdakwah karano manculiak puti bungsu dari sungai ngiang seharusnya bundo kanduang salaku kapalo pemerintahan berhak memberikan kato hukum tapi kasus pelanggaran adat itu diadili oleh basa ampek bali lembaga yudikatof nan sadonyo terdiri dari laki-laki. Nan tantu sajo ateh restu dan pertimbangan sang ratu bundo kanduang.
Seharusnya bundo kanduang salaku kapalo pemerintahan berhak memberikan kato hukum tapi kasus pelanggaran adat itu diadili oleh basa ampek bali lembaga yudikatof nan sadonyo terdiri dari laki-laki. Nan tantu sajo ateh restu dan pertimbangan sang ratu bundo kanduang. Nah, angku-angku dunsanak pandanga dari keseimbangan hak dan kewajiban itulah terciptanyo kerukunan dalam masyarakat minangkabau, kemudian angku-angku akan kami ajak manyalusuri radius kewajiban seorang laki-laki dalam keluarga baitupun dalam masyarakat kampuang ka nagari, pado pokoknyo seorang laki-laki di minangkabau mempunyai fungsi rangkap, fungsi nan mengakibatkan tumbuahnyo ampek tangguang jawab dalam wewenang nan babeda, partamo fungsi ayah sebagai baban langsung dari hukum Islam bahwa ayah mamikua tangguang jawab panuah kapado istri dan anak-anaknyo nan maliputi tangguang jawab layia dan tangguang jawab batin, sandang, pangan, perumahan, pendidikan dan kesejahteraan keluarga sesuai dengan kebutuhan. Inyo wajib melaksanakan tugas-tugas kebapakannya sampai anak-anak dewasa. Nan padusi sampai basuami nan laki-laki sampai mampu hiduik mandiri. Disamping fungsi ayah jo fungsi mamak sebagai pengamalan dari ajaran adat mamak punyo tangguang jawab moral memimpin anggota kaumnyo sapanjang bateh-bateh nan tagarih di pusako, mamak akan manarukokan sawah, mambukakkan hutan paladangan, mambangunkan rumah gadang kemudian mangatur pamakaiannyo. Dalam hal iko beliau bukan bakarojo surang akan tetapi dilaksanakan sacaro bagotong royong antara saluruh mamak-mamak dalam kaum nan sifatnya insidentil. Sedangkan tugas-tugas mamak sacaro pribadi adolah mangatur hal-hal nan bukan materil seumpama manjago karukunan rumah gadang nan panghuninyo terdiri dari babarapo unit keluarga. Katokanlah mamah berfungsi sebagai koordinator rumah gadang nan batangguang jawab kalua dan kadalam. Seandainyo ayah dan kamanakan-kamanakannyo atau urang sumando indak mampu mambari nafkah keluarga disebabkan sakik, disababkan lamah atau bacarai umpamonyo, mako fungsi ayah diambil alih oleh mamak. Dunsanak kamanakan ndak katalantar biayanyo dari harato pusako dan mamak-mamak akan menggarapkan sawah secara kolektif dengan itu berarti tasadio dua figur penyelamat dalam satu keluarga yaitu ayah dan mamak, kalaupun salah satu tidak berfungsi masih ado fungsional lain sehingga jaminan kehidupan mutlak tapanuhi bia kehidupan material atau-pun kehidupan spiritual. Itu sababnyo ndak pernah tadanga ratapan anak yatim di tanah minang, anak piatu nan kamatian mandeh ndak kamandarita di tangan ibuk tiri sabab si anak akan diasuah di rumah gadang oleh padusi-padusi di dalam kaumnyo. Nah, dunsanak, kamanakan pandanga. Kalau tadi ado duo paranan dimainkan seorang laki-laki di minangkabau yaitu peran ayah dari hukum Islma dan peran mamak dari hukum adat, mako ado satu peran lain yang bersumber dari undang-undang yaitu tuntutan kewajiban kapado masyarakat lingkungannyo satiok urang musti berpartisipasi taradok masyarakat kampuang dimanyo tingga, mamaliharo karukunan basamo sabagai satu kesatuan warga dalam wilayah jorong atau desa, membangun sarana-sarana jalan, irigasi, pendidikan, rumah ibadah, sekolah apo sako kebutuhan yang bersifat umum. Elok rumah dek tungganai, elok kampung dek urang tuo, dek nagari dek panghulu. Nah urang tua nan mukasuik disiko adolah kapalo desanan staftnyo mamak-mamak yang di rumah gadang tadi. Di tangan merekalah talataknyo karukunan dan ketertiban masyarakat kampung. Tapi alah salasai ka tugas dengan tigo tuntutan kewajiban tadi, alun, alunlai, masih ado ciek lan nan kadikakok apotu, yaitu wilayah yang labiah luas iyolah nagari, nagari yang kalau kito jabarkan labiah luas lai yaitu negara, seluruh potensi harus dikerahkan apo nan ado didermabaktikan untuk nagari atau untuk negara yo dana, yo tanago, pikiran, waktu dan lain sabagainyo, pendeknyo ndak satupun urang yang bebas dari tugas-tugas kanagarian, bajalan bairing, baiyu maisi patah batongkek buto bairik, sadonyo musti talibat, tantu sajo sabateh kampuan surang-surang.
mambantu dunsanak-dunsanak nan di kampuang konon kabanyo dana nan takumpua mancapai jumlah satu milyar alhamdulillah satu pernyataan dari papatah nan mangatokan saciok bak ayam sadanciang bak basi mandapek samo baruntuang kaciciran samo marugi tibo di elok baimbauan tibodi buruk baambauan bukti lagi bahwa nagari lai bapatenggangkan banyak kamanakan, talalu banyak contoh-contoh nan manguatkan bahwa tabang gagak jo itamnyo bajalan urang minang jo adatnyo dimanopun bumi urang dipijak langik urang dijunjuang namun bumi jo langik minangkabau ndak kalupo pernah seorang sarjana sosiologi manyabuik-nyabuik minang dalam desertasinyo untuak mancapai doktor antaro lain baliau mangatokan bahwa urang-urang minangkabau itu kuno, licik dan pelit licik itu caro awaknyo galia ma, pelit artinyo sampilik, ceke mandanga kato-kato nan tak lamak dari si sarjana nan bukan minang itu urang awak heboh bak labah tahoyak sarang tasingguang bana puncak kadanyo berang, banci, kutuak sumpah sarapah babaua manjadi satu macam-macam reaksi urang waktu itu dari golongan intelektual ado nan manantang badebat di forum resmi utang-utang hukum mangatokan bisa dituntuik di pengadilan karano itu penghinaan politikus manilainyo SARA mangancam kerukunan dan kesatuan nasional para remaja berkomentar paja tu sakik hati ka pamuda minang sabab cintonyo ditulak nan pareman manggaregak dan sado laki-laki dilapuak muncuang paja tu dan lain sabagainyo akhirnyo dengan babarapo partimbangan masalah ko didiamkan sajo nah terlepas dari persoalan dari hargo diri sabab barang nan dicintoinyo di cacek urang, seolah-olah urang awak ingin mangatokan raip raite orong my country kok rancak kok buruak nagari den manga-manga ka kau kiro-kiro baitulah, angku-angku dunsanak pandanga berpedoman kapado kenyataan nan kito kamukokan tadi dapeklah kito tariak kesimpulan bahwa image nan mangatokan bahaso urang minang marantau adolah palarian menyingkirkan diri dari struktur masyarakat nan tak manusiawi atau marupokan pambarontakan adat tarnyato bohong samo sakali suatu persangkaan nan tak punyo dasar urang laki-laki di minangkabau ndak pernah mengeluh apolai mambarontak inyo indak maraso dirugikan malah sabaliaknyo maraso bangga dan bahagia kalau dikana dipikia-pikia baitu sarek tugas nan disandangnyo tugas sebagai ayah sebagai mamak, sebagai putra daerah nan bagi urang lain mustahil ta angkek sakaligus mako akan timbul pertanyaan resep apo nan dibarikan dan baa caro mamparsiapkan fisik stamina dan mentalnyo sahinggo sanggup manjadi supermen macam itu jawabnyo iyolah mereka digodok di pusdiklat adat, apo pulo itu pusdiklat adat.
our life 
